Sangano revarairidzi vekumaruwa, reAmalgamated Rural Teachers Union of Zimbabwe, rinoti hapana hurumende munyika yeZimbabwe yakambo mbunyikidza varairidzi nekuvabata zvisina chiremera sezviri kuitwa nehurumende yaVaEmmerson Mnangagwa.
Mutungamiri wesangano iri, VaObert Masaraure vaudza Studio 7 kuti, “Kubva zvapinda vaMnangagwa pahutongi ne ’New Dispensation’ yavo, varairidzi vakapambwa vakatochwa vanoita vanomwe; varairidzi vakasungwa vanoita makumi maviri nevapfumbamwe, uye varairidzi vakatyityidzirwa vanoita chiuru nevashanu.”
Vanoti zvekare, varairidzi vakanyimwa mari dzavo dzemihoro vanoita makumi matatu neumwe, vamwe gumi nevaviri vakadzingwa mudzimba dzechikoro dzavaigara.
VaMasaraure vanoti kushungurudzwa, kuzvidzwa nekudzvanyirirwa kuri kuitwa varairidzi hakuvatyisi, vachiti varikuyambira hurumende kuti igare pasi itaurirane navarairidzi nokuti varairidzi havasi kuzodzokera sure panyaya yemihoro yavo sezvo vasisakwanisi kurarama nemari yavari kutambira.
Your browser doesn’t support HTML5
Hurukuro naVaObert Masaraure