Sangano ravana chiremba vanorwira kodzero dzevanhu, reZimbabwe Association of Doctors for Human Rights, ZADHR, rashora zvikuru hurumende mukushandiswa kwemabara nemapurisa nemauto mukuedza kumisa vanhu vari kuratidzira.
Vanhu muHarare, Epworth, Chitungwiza nedzimwe nzvimbo dzakapoteredza Harare neBulawayo vavhara migwagwa vachipisa matayi emota vachiratidza kutsutsumwa kwavo nekukwidzwa kwakaitwa mafuta emotikari mazuva maviri apfuura.
Mutauriri ZADHR, Dr Fortune Nyamande, vaudza Studio 7 kuti vanachiremba vesangano ravo riri kurapa vanhu vazhinji vakuvadzwa mukuratidzira uku.
Vaenderera mberi vachiti pane vakuvara, pane vamwe gumi nevatatu vanyanya kukuvadzwa kupfuura vamwe uye vari kutovhiyiwa muzvipatara. Hatina kukwanisa kubata vatauriri vemapurisa nemauto kuti tinzwe divi ravo panyaya iyi.
Your browser doesn’t support HTML5
Hurukuro naDr Fortune Nyamande