Mutungamiri weMDC, VaNelson Chamisa, vanonzi vakati avo vaida kuva kwikwidza pachinzvimbo chemutungamiri hwebato iri, VaElias Mudzuri naVaDouglas Mwonzora, havazoregwi vachisiya bato iri asi kuti vachapihwa zvinzvimbo zvikuru mubato reMDC.
Matunhu gumi nemaviri eMDC, kunze kwedunhu remuSouth Africa, iro risati raita kongiresi yaro, akadoma VaChamisa semutungamiri webato izvo zvinonzi zvinoratidza kuti VaChamisa ndivo vachatsigirwa nebato iri kuti vave mutungamiri waro pakongiresi huru ichaitwa mwedzi unouya.
VaMwonzora naVaMudzuri vakamboratidza chido chekuda kukwikwidza chigaro chemutungamiri webato kana vachinge vadomwa.
Kubuda pachena kwevaviri ava kwakambokonzera mutauro mukuru mubato iri.
VaMwonzora vakadomwa nedunhu rimwe chete kuti vakwikwidze pachigaro chemunyori mukuru, ukuwo VaMudzuri vakadomwawo nedunhu rimwe chete kuti vakwikwidze pachigaro chemutevedzeri wemutungamiri webato.
Studio7 haina kukwanisa kunzwa kumutauriri waVaChamisa, VaNkululeko Sibanda, kuti tinzwe kana chiri chokwadi chakaitwa nevatatu.
Nyanzvi mune zvematongerwo enyika uye vachidzidzisa paTswaane University of Technology, Doctor Ricky Mukonza, vanoti zvataurwa naVaChamisa zvichabatsira kuti bato iri rirambe rakabatana sezvo vaviri ava vane vatsigiri vavo mubato kunyange hazvo vari vashoma.
Doctor Mukonza vanoti VaChamisa vari kuita zvavakaitwa nevaimbova mutungamiriri webato iri, VaMorgan Tsvangirai, avo vakapa VaChamisa chinzvimbo mubato mushure mekunge vakundwa naVaMwonzora musarudzo yemunyori mukuru webato pakongiresi yakaitwa muna 2014.
Your browser doesn’t support HTML5
Hurukuro naDoctor Ricky Mukonza