Zvizvarwa zveZimbabwe zvinogara munyika dzakatenderedza Zimbabwe izvo zvine mapasipoti ari kupera gore rino nerinouya zviri kuchema chema zvichiti kutanga kushanda kwe e-passport muna 2024 kuchaita kuti vabhadhare mari yakawanda.
Kunyange hazvo pasipoti itsva ye e-passport iri kutarisirwa kupedza kubiwa kana kuchengetedza kwemapasipoti, zvizvarwa zveZimbabwe zvine mapasipoti ari kupera gore rino nerinouya zvinoti hazvisi kufara nehurongwa uhu.
Kuitira kuti zvikwanise kuwana magwaro ekugara munyika dzakapoteredza Zimbabwe dzinoti Botswana, South Africa, Zambia nedzimwewo, zvizvarwa zveZimbabwe zvinoti zvakatarisana nekhubhadhara mari inodarika mazana matanhatu ekuAmerica munguva pfupi.
Sezvo vachida kuti mapasipoti abude nekukurumidza, vazhinji vanogara munyika dzakapoteredza Zimbabwe vari kubhadhara madhora mazana matatu ane gumi nesere kuti vatore pasipoti yekudhara kotiwo mukupera kwegore rinouya vobvisazve madhora mazana maviri kuti vawane pasipoti itsva.
VaJustice Muramba, avo vanogara muguta reFrancistown muBotswana, vaudza Studio7 parunhare kuti varovera moyo padombo ndokunotoresa mwanasikana vavo pasipoti itsva kunyange vachiziva kuti iri kumiswa gore rinouya.
Semunhu ane mukadzi nevana vatatu, VaMuramba vaenderera mberi vachiti vakatarisana nedambudziko rekutsvaga nemari inodarika chiuru chimwe chete chemadhora ekuAmerica kuti vakwanise kutora mapasipoti.
Hurumende yakadzika mutemo weStatutory Instrument 273 of 2021 uyo unoti pasipoti iri kushandiswa ikozvino ichamiswa kushanda muna Zvita wegore rinouya muchiitiko chichamakidza vanhu kuti vatore e-passport.
Chimwe chizvarwa cheZimbabwe chinogara muguta reLusaka muZambia, VaShadreck Mwewa, vanoti vanoona richava gangaidzwa mhezi yavavira mudumbu kuzvizvarwa zveZimbabwe zvizhinji kuti zviwane pasipoti itsva iyi
VaRonald Chikwenhere vanogara muJohannesburg, kuSouth Africa vanoti hurumende inogara ichida kuomesera vanhu uye zvinogara zvichivanetsa kuti sei pasipoti yemuZimbabwe iri iyo inodhura chete kana zvichiyenzaniswa nedzedzimwe nyika.
Asi chimwewo chizvarwa cheZimbabwe chinogara muguta reBlantyre muMalawi, VaCharles Chinyengetere, vaudza Studio7 parunhare kuti pasipoti itsva iyi ichabatsira zvikuru mukuderedza kubiwa kwemapasipoti.
Studio7 haina kukwanisa kunzwa divi rehurumende panyaya iyi sezvo gurukota rinoona nezvemukati menyika, VaKazembe Kazembe, vati vatumirwe mibvunzo paWhatsapp asi vanga vasati vapindura kusvika taenda pamhepo.
Nyanzwi munyaya dzemitemo yekufamba kwevanhu, Muzvare Primrose Mhandu, vanoti hurumende yava mubishi kutsvaga mari muvanhu vanogara kunze kwenyika.
Kunofungidzirwa kuti kune zvizvarwa zveZimbabwe zviri pakati pemamiriyoni mana nemamiriyoni manomwe zvinogara kunze kwenyika.
Your browser doesn’t support HTML5
Nyaya ina Shingirai Madondo