Retired Brigadier Agrippa Mutambara vebato rinopikisa reZimbabwe People First rinotungamirwa naAmai Joyce Mujuru avo vakarohwa zvakaipisisa paDunaventy Farm kuGuruve, Mashonaland Central Province vanonzi ivo nevamwe vavo vashanu vaiswa mumaoko emapurisa kuchipatara chiri kuBindura uko vari kurapwa.
Mhirizhonga iyi yakaitika nemusi weSvondo. Brigadier General Mutambara nevamwe vavo vakarohwa nevanofungidzirwa kuti vatsigiri veZanu-PF apo vainge vaenda kunonunura nhengo yebato ravo VaWilbert Mubayirwa avo vanonzi vaida kupisirwa mumba nenhengo dzeZanu-PF dziri kuda kutora nzvimbo yavarikurima.
Mutauriri weZimbabwe People First VaJelousy Mawarire vanoti nyaya yemhirizhonga yeZanu-PF ioratidza kuti bato iri rapererwa. “Makamboona bere rikapererwa, rinogona kuvhima dhongi rakasungirirwa pangoro.”
Hatina kukwanisa kubata mutauriri weZanu-PF VaSimon Khaya Moyo kuti tinzwe divi ravo panyaya iyi.
Your browser doesn’t support HTML5
Hurukuro naVaJelousy Mawarire