Gwaro rehurumende reGovernment Gazette iro rinoratidza mazita evanhu vachakwikiwdza musarudzo dzegore rinoratidza kuti nhengo dzeNational Patriotic Front, NPF, kubva kuchikwata chebato iri chinotungamirirwa naAmai Sandie Moyo, dzakaita saVaShadreck Mashayamombe naVaJeppy Jaboon, dziri kumirira MDC Alliance kunyange hazvo bato iri risati rave muMDC Alliance.
Izvi zvakaitwa kunze kwechibvumirano izvo zviri kupa kuti vakawanda muMDC Alliance, vati MDC-T yaVaChamisa yava kuita humbimbindoga nepamusna pekuti ndiro bato rine vanhu vakawandisa.
Mutauriri weMDC Alliance, Professor Welshan Ncube, vaudza Studio7 kuti vanhu vakaita saVaMashayamombe, VaJaboon nevamwe vana vakaronga neMDC-T inotungamirirwa naVaNelson Chamisa kuti vaizomirira bato iri muMDC Alliance.
Mutauriri weMDC yaVaNcube, VaKurauone Chihwai, vati izvi hazvirevi kuti NPF yave nhengo yeMDC Alliance.
Nyanzvi mune zvematongerwo enyika dzinoti zviri kuitika muMDC Alliance zvinoburitsa pachena kusavimbika kuri mumubatanidzwa uyu.
Nyanzvi idzi dzinotiwo mapato anofanirwa kuremekedza zvibvumirano zvaanenge awirirana kuitira kuti agare akavimbika kwete kuonekwa chiita zvechitsotsi munguva ino apo munhu wese ari kuchemera hutongo hwejekerere.
Asi vanotungamira mabasa ekuronga misangano muMDC Alliance zvakare vari sachigaro veMDC-T yaVaChamisa, VaMorgan Komichi, vaudza Studio7 kuti vanhu ava vakaita saVaMashayamombe vave kumirira Alliance uye havasisiri kumirira NPF.
Vatiwo NPF ibato rakazvimirira rakatonyoresawo nhengo dzaro kuti dzirimirire musarudzo.
Dzimwe nhengo dzeMDC Alliance hadzisi kufara nenyaya yekuti MDC-T yakatora zvimwe zvigaro zvainge zvabvumirana kuti zvichapihwa mapato aya ikazvipa kunhengo dzeNPF dzakabva kubato reZanu PF.
Semuenzaniso, Harare South inzvimbo yainge yapihwa Transform Zimbabwe asi veTransform Zimbabwe vakazoshamisika kuona VaMashayamombe vosainirwa kuti vakwikwidze kunzvimbo iyi pasina kuwirirana mumubatanidzwa uyu.
Kuita kwakadai ndiko kwaita kuti mumatunhu mazhinji mumire nhengo mbiri mbiri kana kudarika dzichiti dzinomirira MDC Alliance zvichitevera kupindira kwevakuru muMDC-T musarudzo dzekutsvaga vachamirira bato iri musarudzo.
Zvichakadai, gwaro reGovernment Gazette rinoratidza kuti pane nhengo dzeMDC Alliance dzisiri kukwikwidzwa mumawadhi anodarika makumi mana uye mazhinji acho ari mumatunhu eMashonaland Central neMidlands.
VaKomichi vanoti hapana chinoshamisa vachiti musarudzo dzapfuura vakatotadza kumisa vanhu mumawadhi akawanda kudarika gore rino.
VaNcube vaudza Studio 7 kuti sarudzo dzakanyanya kukosha dzedzemutungamiri wenyika idzo dzinoita kuti vakwanise kutungamirira hurumende nekutonga nyika sekuronga kwavo.
Your browser doesn’t support HTML5
Nyaya Ina Godwin Mangudya