Mudhorobha reMasvingo mafuma makazara nevatsigiri veZanu vachinyoresa mazita avo kuitira kuti vapinde mumusangano wepagaore webato iri uyo watanga kuMasvingo.
Vatsigiri veZanu PF ava vange vachinyoresa mazita avo pachikoro che Masvingo Polytechnic, kuitira kuti vabvumidzwe kupinda mumusangano uyo uri kushoropodzwa nevamwe vagari mushure mukubuda kwemashoko ekuti Zanu PF yakashandisa mari inosvika mamiriyoni matanhatu emadhora pagadziroro dzemusangano uyu.
Mari iyi yakashandiswa kuvandudzwa migwagwa yedhorobha yaiva nemakomba kuitira kuti motokari dzemutungamiri wenyika, Va Robert Mugabe, dzifambe zvakanaka.
Vamwewo vanoti pakashandiswa mari yakawanda pakuvandudza imba ichagara VaMugabe mumusha weshoroma we Rhodene.
Imba iyi inonzi yakaita zviuru zana nemakumi masere emadhora kuti ivandudzwe, uye pari kuchengetedzwa zvakasimba nemauto akapakatira zvombo.
KuMucheke kunogara veruzhinji, kuri kuvandudzwawo dzimba dzeuswa dzaigara vaiva mutevedzeri wemutungamiri wenyika, mushakabvu Simon Muzenda, kuti iitwe imba inoshanyirwa nevanoda kuona zviwanikwa zvenyika.
Imwe nhengo huru yeZanu PF kuMasvingo, Amai Maina Mandava, vanoti gadziriro dzavo dzakafamba zvakanaka uye vatanga kugashira vaenzi vavo neChipiri.
Asi izvi hazvisi kufadza vagari vemudhorobha vari kuti uku kutambiswa kwemari apo veruzhinji vari kunonga svovse nemuromo.
Mumwe wevanhu vasiri kufara nehurongwa uhu ndiVaTakundwa Togaresei.
Mumwewo mugari aramba kudomwa zita rake ati zvinoratidza kuti musangano we Zanu PF unokoshesa mukuru wenyika chete kupfuura ruzhinji rwevanhu.
Vamwe vagari vari kutsutsumwira Zanu PF vachiti yazoyeuka VaMuzenda kwapera makore gumi nematatu.
Dzimba dzavo dzakanga dzakanganikwa dzangova matongo kunyange hazvo pamusha uyu paiitirwa zvematongerwe enyika munguva yehotongi hwehudzvanyiriri.
VaMugabe vanotarisirwa kuvhura imba yaVa Muzenda nemusi China.
Asi mutungamiri webazi revechidiki re Zanu PF, Talent Chivange, atsigira kurangarirwa kwa VaMuzenda pamwe nekuvandudzwa kwedhorobha achiti izvi zvanga zviri muhurongwa hwemusangano wavo kwenguva refu.
Kunyange hazvo musangano wepagore watanga neChipiri, VaMugabe nevamwe vavo vanotarisirwa mudhorobha musi we China pavanovhura musangano wavo uri kuitwa pasi pedingindiri rinoti Moving with Zim Asset in Peace and Unity.
Musangano uyu uri kuitwa panguva iyo zvinhu zvisina kumira zvakanaka mubato zvichitevera kurwisana kuri kuita zvikwata zviri mubato iri zvinoti Generation 40 ne Team Lacoste.
Generation 40 inonzi ine vanhu vakaita saVaSavior Kasukuwere naVaJonathan Moyo nevamwe, ichitsigirwa nemudzimai waVaMugabe, Amai Grace Mugabe.
Ukuwo Team Lacoste inonzi ine vanhu vanotsigira mumwe wevatevedzeri vemutungamiri wenyika, VaEmmerson Mnangagwa.
Zvikwata zviviri izvi zviri kurwira kutora masimba kana VaMugabe vabva pachigaro.
VaMugabe vanotarisirwa kuvhara musangano uyu nemusi we Chishanu, uye unotarisirwa kupindwa nevanhu zviuru zvinomwe.
Your browser doesn’t support HTML5
Nyaya Ina Gandri Maramba