MDCT inotungamirwa naVaDouglas Mwonzora inoti ichandzinga nhengo dzeparamende dzakapinda mudare iri dzichishandisa zita reMDC Alliance kana dzikaratidza kuti dziri kutsigira VaNelson Chamisa avo vakaparura bato idzva riri kudaidzwa kuti Citizens Coalition for Change.
Nekune rumwe rutivi, chimwe chikwata cheMDCTchinoti chiri kutungamirwa naMuzvare Thokozani, chinotiwo chiri kuda kudzinga muparamende vose vari kutsigira VaMwonzora.
Mutauriri weMDCT yaVaMwonzora, VaWitness Dube, vati kana nhengo dzeparamende dzakasarudzwa muna 2018 dzichishandisa zita rekuti MDC Alliance dzikaratidza kuti dziri kutsigira bato idzva raVaChamisa vachadzidzinga muparamende vachiti dzinenge dzatyora mutemo wenyika pamwe newebato ravo.
Muzvare Khupe, avo vakambomiswa basa naVaMwonzora semutevedzeri wavo, vanoti VaMwonzora vave kushanda naVaMwonzora mune yavari kuti MDC Alliance havasirivo vakanyorerana chibvumirano chekuumba mubatanidzwa weMDC Alliance nevaimbova mutungamiri weMDCT, mushakabvu VaMorgan Tsvangirai.
Mutauriri waMuzvare Khupe, VaNtando Ndlovu, vati bato ravo richadzingawo nhengo dzeMDCT yaVaMwonzora muparamende vachiti vave kune rimwe bato sezvo VaMwonzora vakanyorera Zimbabwe Electoral Commission, kana kuti ZEC, vachiti boka ravo richakwikwidza sarudzo dzema by-elections richichishandisa zita rekuti MDC Alliance.
Mumiriri weZengeza West muparamende, VaJob Sikhala, avo vari kutsigira VaChamisa, vati ivo nevamwe vavo havasi kutya kuti vachadzingwa muparamende naVaMwonzora vachiti chakakosha ndechekuti vanhu vakavasarudza vari kuda zvipi.
VaChamisa vanoti vane tarisiro yekuti nhengo dzeparamende dzakasarudzwa dzichishandisa zita reMDC Alliance dzichapedzisa kotoro yadzo vachiti bato ravo idzva reCitizens Coalition for Change ihomwe inokwana munhu wese kusanganisira vari muZanu PF pari zvino nemamwe mapato.
Mutemo wezvesarudzo weElectoral Act unoti hapazoitwi mamwe ma by-elections kana kwasara mwedzi gumi nemiviri kuti paitwe sarudzo huru kana general election.
Zvichakadai, imwe nyanzvi munyaya dzezvematongerwo enyika, VaRashweat Mukundu, vati hazvina zvazvichabatsira kana VaMwonzora vakaenderera mberi nekudzinga nhengo dzakasarudzwa dziri muMDC Alliance dzinenge dzatsigira VaChamisa sezvo vachiti hapasisina nguva yakareba sarudzo dzemuna 2023 dzisati dzaitwa.
Asi dzimwe dzenhengo dzeparamende idzi idzo dzingangokanganiswa nedanho riri kuda kutorwa neMDCT yaVaMwonzora pamwe neyaMuzvare Khupe, idzo dzisina kuda kubuda pamhepo dzati shuviro yadzo ndeyekuti dzipedze kotoro yadzo inova yechipiri kuti dzigowana kupinda pamudyandigere sezvo nhengo dzinenge dzaita kotoro mbiri dzakatevedzana dziridzo dzinokodzera kuenda pamudyandigere.
VaChamisa vakazivisa nezuro kuti bato ravo idzva reCitizens Coalition for Change richapinda musarudzo dzema by-elections akatarisirwa kuitwa musi waKurume 26 richishandisa zita idzva iri kunyange hazvo vachiti makwikwi makuru ariko gore rinouya apo pachaitwa sarudzo itsva dzinobatanidza sarudzo yemutungamiri wenyika, sarudzo dzenhengo dzeparamende pamwe nemakanzura.
Matare achatora mazita evanhu vachakwikwidza musarudzo dzema by-elections akatarisirwa kugara mangwana mumatunhu ose achange achiitwa sarudzo idzi.
Your browser doesn’t support HTML5
Nyaya Ina Frank Chikowore