Svondo rapera nyika yakamuka ichinzwa nezvenyaya yekufa kwemwanakoma ane makore manomwe, Tapuwa Makore, uyo aigara mudunhu rekwaMukarakate pasi paIshe Mangwende kwaMurehwa.
Chakazonyanya kukatyamadza vanhu ifiro inonzi yakaita mwana uyu, yekupondwa, uye kudimurwa-dimurwa kwenhengo dzemuviri wake nemhondi dzinofungidzirwa kuti dzaida kuzotengesa nhengo idzi kune dzin'anga kana vanamuzvinabhizimusi.
Chinotsamwisa pamwe nekusuvisa ndechekuti pamhondi idzi pane murume wemakore makumi mana Tafadzwa Shamba, uyo anofungidzirwa kuti ane chekuita nekuurayiwa kwemwana uyu.
Mapurisa anoti murume wemakore makumi mana uyu mufudzi wemombe weimwe mhuri inogara mubhuku rimwechete nemhuri yemukomana uyu.
Pane fungidziro yekuti Shamba nevamwe vake vakapamba mukomana uyu kubindu kwaakange aenda vakamuchengeta mune rimwe gomo kusvika hwave usiku apo anofungidzirwa kuti akazomuuraya achishanda nedzimwe mhondi dzinonzi nemapurisa dzichiri kutsvagwa.
Mushure mekuponda mwana uyu, imwe yemhondi idzi inofungidzira kuti yakazotora musoro wemwana uyu yakaenda nawo kwaJuru, uko kunonyanyozivikanwa sekwaBhora, mushure mekuvimbisa mufudzi wemombe uyu mari inoita madhora ekuAmerica chiuru nemazana mashanu.
Pane fungidziro yekuti mhondi idzi dzaishanda nemumwe muzvinabhizimusi kana n'anga, vanogona kunge vakati dzitsvage nhengo dzemwana mudiki.
Mubvunzo uri pamiromo yevanhu vakawanda ndewekuti mukore uno kuchine vanhu vari kutsvaga kupfuma vachishandisa mishonga? Mishonga ine ropa remunhu?
Munyori wedzidzo musangano revarapi vechivanhu reZimbabwe National Traditional Healers Association, ZINATHA, Sekuru Prince Mutandi Sibanda, vanoti sangano ravo hari bvumidze nhengo dzaro kushandisa ropa remunhu.
Sekuru Sibanda vanoti kana kuchine n'anga dziri kuti dzinoda kusanganisa mishonga nenhengo dzemunhu, veruzhinji vanofanirwa kumhan'gara kumapurisa nekukasika.
Ko handiti vakuru vakati "Kupfuma ishungu?" Hazvirevi kuti unoita shungu dzekupfuma nekudeura ropa remunhu. Hupenyu hwemunhu hunokosha kuraswa nenzira yakadaro.
Your browser doesn’t support HTML5
Hurukuro naSekuru Prince Mutandi Sibanda