Vadzidzi vatatu vepachikoro chepamusoro cheUniversity of Zimbabwe vakasungwa nemusi weChina mushure mekuratidzira pamhemberero dzekupiwa zvitupa zvekupedza zvidzidzo dzaitungamirwa nemutungamiri wenyika vaRobert Mugabe, vaburitswa muhusungwa.
Vadzidzi ava vaburitswa mushure mekubhadhariswa madhora gumi pamunhu semari yekubvuma mhosva yavaipomerwa yekuita zvisina maturo kana kuti criminal nuisance.
Vatatu ava, avo vanoti VaTondera Dombo, VaAlexander Mukamba naVaThembinkosi Rushwaya, vakasungwa mushure mekunge vasimudza zvinyorwa zvenyunyuto zvaiti vapedza chikoro nhasi asi mangwana vanenge vave marovha.
Vatatu ava vakabva vangotorwa nevanochengetedza mutungamiri wenyika, avo vanonzi vakambovabvunzurudza nekuvatyisidzira vasati vavaisa mumaoko emapurisa.
VaDombo, avo vakapedza zvidzidzo zvavo zveBachelor of Applied Arts, vanoti vazorara pakamba yemapurisa yeHarare Central Police Station, apo vanoti havana zvinyunyuto zvavangapomera mapurisa.
Kunyange hazvo vari kuti havana mhosva yavakapara, VaDombo, avo vakambotungamira vadzidzi, vanoti vabvuma kubvisa mari yefaindi kuitira kuti vakwanise kudzokera kuchikoro neMuvhuro unouya sezvo vave kuenderera mberi nedzidzo yavo.
Asi vanoti havana chokwadi chekuti vachabvumidzwa here kuenderera mberi nechikoro, kanawo kupiwa magwaro avo ekupedza zvidzidzo kana kuti ma certificate zvichitevera zvavakaita izvi.
Gurukota rezvedzidzo yepamusoro Muzvinafundo Jonathan Moyo vanonzi vanyorawo padandemutande reTwitter kuti VaDombo vanofanirwa kunyimwa gwaro ravo nezvavakaita izvi.
Your browser doesn’t support HTML5
Hurukuro naVaTonderai Dombo