Mutungamiri webato rinopikisa reMDC, VaNelson Chamisa, vakwanisa kudomwa nematunhu ose ebato ravo ari gumi nematatu kuti vatungamire bato iri kwemamwe makore mashanu, zvichitevera kudomwa kwavakaitwa zvakare nedunhu reSouth Africa mukupera kwesvondo.
Bato reMDC riri kutarisirwa kuita musangano waro mukuru wekongiresi musi wa 24 kusvika 26 mwedzi unouya, apo pachasarudzwa vanhu vachatora zvigaro zvakasiyanasiyana.
MDC ine matunhu gumi munyika, kuchitiwo rimwe kuAmerica, rimwe kuBritain nerimwe kuSouth Africa.
Kudomwa kwaVaChamisa nematunhu ose kwave kureva kuti chigaro chemutungamiri webato hachisi kuzokwikwidzwa.
Zvichakadaro, vamwe vateveri vebato iri vari kunyunyuta nehurongwa kwekuti vamwe vachatora zvigaro mubato iri vachaita zvekudomwa nemutungamiri webato, kwete kusarudzwa kukongiresi.
Asi mutauriri weMDC, VaJacob Mafume vanoti hurongwa hwekuti vamwe vachabata zvigaro mubato iri vachaita zvekudomwa nemutungamiri webato huri pamutemo.
Vanoti zvigaro zvichadomwa vachazvitungamira zvinosanganisira chemutauriri webato, pamwe nechemurongi wemisangano.
Your browser doesn’t support HTML5
Hurukuro naVaJacob Mafume