Mapato ezvematongerwo enyika anopikisa pamwe nemasangano anorwira kodzero dzevanhu akabata mukunyora gwaro renyunyuto kusangano reunited Nations General Assembly neSecurity Council, vachi kurudzira kuti mauto pamwe nepurisa eZimbabwe ari mumabasa ekuchengetedza runyararo pasi rose pasi peUN vabviswe.
MDC T, Zimbabwe People First, People’s Democratic Party nemamwe mapato pamwe nemasangano akazvimirira anosanganisira reNational Vendors Union, #ThisFlag neCrisis in Zimbabwe Coalition, vanoti vatora danho iri nekuona kuti hurumende yaVaRobert Mugabe iri kuramba ichi tyora kodzero dzevanhu munyika, chinove chinhu chinopikisana nemitemo yekodzero dzevanhu pasi rose.
Mutauriri weMDC T VaObert Gutu vanoti sebato rinorwira kuti munyika muve nerunyararo, vakaona zvisingaiti kuti hurumende iri kutyora kodzero dzevanhu munyika asi kunze uko ichinonyepera kunge inoremekedza kodzero dzevanhu kana yoita mabasa ekuchengetedza runyararo pasi peUN.
Your browser doesn’t support HTML5
Hurukuro naVaObert Gutu
Asi mumiriri weMakonde muparamende uye vari nhengo yeZanu PF, VaKindness Paradza vanoti zvakaitwa nemapato pamwe nemasangano aya hazvina nematuro ose, sezvo UN ichivimba neZimbabwe kuburikidza nekugona kwayo basa rekuchengetedza runyararo.
Your browser doesn’t support HTML5
Hurukuro naVaKindness Paradza