Rimwe sangano rinomiririra vadzidzisi, reProgressive Teachers Union of Zimbabwe, PTUZ, rayambira hurumende kuti yasarirwa nemazuva matatu chete kuti igadzirise zvichemo zvevarairidzi.
Izvi zvinotevera mazuva gumi nemana akapiwa hurumende nevashandi vayo ekuti igadzirise zvinhu, kukundikana kwayo voramwa mabasa.
Vashandi vehurumende vari kuda kuti vawedzerwe mari dzemihoro, uye kuti vatambiriswe mihoro yavo nemari dzekuAmerica.
Mutungamiriri wesangano iri, Doctor Takavafira Zhou, vanoti hurumende haidi kuteerera zvichemo zvevarairirdzi asi inoda kusvitsa vashandi pakuramwa mabasa, zvinove izvo zvichaitika kutanga musi weMuvhuro svondo rinouya kana vakasawirirana pakupera kwezuva neChishanu svondo chino.
Doctor Zhou vanoti varairidzi vakawanda havana kuenda kumabasa kubva svondo rapera sezvo vakasanganawo nekuratidzira kwemazuva matatu kwakashevedzerwa nesangano reZCTU.
Vanoti nhengo dzavo dzakanga dzagara dzisingaende kumabasa mazuva ose sezvo dzakasunga kuti dzichange dzichishanda zuva rimwe chete pasvondo kusvika hurumende yagadzirisa zvichemo zvavo.
Your browser doesn’t support HTML5
Hurukuro naDoctor Takavafira Zhou