Gavhuna veReserve Bank of Zimbabwe, Doctor John Mangudya, vataurira bepanhau reFinancial Gazette kuti Zimbabwe iri kunetseka kubhadhara zvikwereti zvayo.
Muna Gunyana gore rapera, zvikwereti zveZimbabwe izvi zvaiita mazana mashanu nemakumi manomwe emamirioni emadhora asi pari zvino zvikwereti zvenyika zvinopfuura mazana matanhatu emamiriyoni emadhora.
Zvichakadaro, VaMangudya vataura izvi apo bhanga repasi rose, reWorld Bank raburitsa mashoko ekuyambira Zimbabwe kuti ivandudze mitemo yainoshandisa munyaya dzezvemari, richiti kana Zimbabwe ikasavandudza mitemo iyi, zvinhu munyaya dzezvemari zvinogona kukanganisika zvakaipisisa gore rino risati rapera.
Nyanzvi mune zvehupfumi uye vachishanda neLabour and Economic Development Research Institute of Zimbabwe, Doctor Prosper Chitambara, vanoti pari zvino hurumende iri kushandisa mari yakawanda kugadzirira sarudzo uye kuhoresa vashandi vayo, naizvozvo mitemo mizhinji haigone kuvandudzwa iye zvino asi mushure mesarudzo.
Your browser doesn’t support HTML5
Hurukuro naDoctor Prosper Chitambara