Sangano rinomirira zvizvarwa zvekune dzimwe nyika zviri kugara muSouth Africa, reAfrican Diaspora Forum, rinoti rine hurongwa hwekusungisa hurumende yeSouth Africa nemhosva yekusunga zvizvarwa zvekune dzimwe nyika zviri munyika iyi zvisiri pamutemo, uyewo kubvumidza mapurisa kupinda muzvitoro zvevabvakure ava achisecha asina magwaro anoapa mvumo yekuita izvi.
Sachigaro vesangano reAfrican Diaspora Forum, Doctor Vusumuzi Sibanda, vanoti sangano ravo riri kukurudzirwa nevakasungwa ava kuti rivamirire mukushungurudzwa kwavakaitwa uye kutyorerwa kodzero dzavo.
Vanoti pavanhu mazana manomwe vakasungwa nemusi weChitatu muJohannesburg, mazana maviri vaburitswa muhusungwa mambakwedza, uye pavanhu ava pane zvizvarwa zveZimbabwe zvinodarika makumi maviri.
Mapurisa akasunga vanobva kunze kwenyika ava muchirongwa chinonzi chakanga chakanangana nekuchenesa mukati meguta reJohannesburgkubva kuvanhu vasina magwaro pamwe nevanopara dzimhosva.
Mutungamiri wedunhu reGauteng, VaDavid Makhura, vakazivisa kuburikidza nedandemutande reTwitter, kuti mapurisa akawanawo zvombo zvakasiyanasiyana pamwe nezvigadzirwa zvinonzi zvaive nemazita ekunyepera zvakawanda mukusecha zvivakwa zvemukati meguta kwaakaita.
Studio7 haina kukwanisa kunzwa divi remapurisa panyaya iyi.
Your browser doesn’t support HTML5
Hurukuro naDoctor Vusumuzi Sibanda