Madzimai mana anove vamwe vevanhu makumi maviri nevatatu vari kukwikwidza musarudzo yemutungamiriri wenyika anoti anoda rubatsiro rwemari rwekuti akwanise kutsvaga vanhu vachaamirira panzvimbo dzekuvhotera pasarudzo dzichaitwa kupera kwemwedzi uno.
Vachitaura pagungano rekuzeya sarudzo range rakarongwa nesangano reZimbabwe Election Support Network richikokerwa naMuzvare Violet Gonda neChina manheru, mutungamiri webato reMDC-T, Muzvare Thokozani Khupe, vakati kunyange hazvo vaine zvichemo zvakawanda pamusoro peZimbabwe Electoral Commission, Zec, chikuru chavanokoshesa kuchengetedzwa kwevhoti uye vanoda vanhu kana kuti ma elections agents maviri panzvimbo yega yega yekuvhotera munyika kuti vachengetedze mavhoti aya.
Pane nzvimbo zviuru gumi dzekuvhotera uye Muzvare Khupe vakati vanoda vanhu zviuru makumi maviri kuti vange vari panzvimbo idzi.
Vakati vanoda miriyoni yemadhora kudzidzisa vanhu ava basa pamwe nekuvaendesa kunzvimbo dzekuvhotera.
Amai Violet Mariyacha vebato reUDM vakatiwo nyaya yevachavamirira panzvimbo dzekuvhotera kana kuti ma agents iri kuvanetsa uye vari kudawo rubatsiro kuti vakwanise kuendesa vanhu ava kunzviumbo dzekuvhotera.
Amai Melbar Dzapasi ve#1980 Freedom Movement Zimbabwe vakati vano bvumirana nevamwe vavo kuti mari inodiwa kuendesa ma agents yakawandisa chose asi kuti vachashanda nezviripo.
Amai Joice Mujuru vakati kunyange hazvo vachida rubatsiro rwemari, vachatsvaga vamiriri vanobva munzvimbo dzavanovhotera kuti vasanetseka nemari yezvekufambisa.
Vana ava vakashora mashandiro eZEC vakati vacharamba vachishanda kuti komisheni iyi ishandure mashandiro ayo kuti nyika iite sarudzo dzakajeka.
Vakatiwo kunyange hazvo mauto akaramba kuti haasi kupindira munyaya dzezvematongerwo enyika pane humbowo hwekuti mauto ari kuita izvi.
Amai Mujuru vakati vakatovhiringidzwa kuChitsungo, kuMashonaland Central nevasori nevamwe vanofudzingirwa kuti masoja.
Vana ava vakatura hurongwa hwazvavachaita kana vachinge vasarudzwa asi zvakabuda pachena kuti veruzhinji vakapinda pahurukuro iyi vanoona sekuti Zimbabwe haisati yagadzirira kuve nemumutungamiriri wechidzimai.
Mumwe wevanhu ava ndaVaTafadzwa Mugwadi avo vanoongorora zvematongerwo enyika vakarerekera kuZanu PF.
Murairiridzi wepaUniversity of Zimbabwe, Muzvinafundo Charity Manyeruke, vakati zvakanaka kuti vanhukadzi vakwikwidze musarudzo dzemutungamiriri wenyika, vachiti asi zvakakosha kuti vapinde musarudzo vaine zvikwanisiro. Vakati havaoni nyika ichitungamirirwa nemunhukadzi pakupera kwesarudzo mwedzi uno.
Vakatiwo kunze kwekushaya mari mhirizhonga nemabatirwo anoitwa madzimai mumapato ezvematongerwro zvinoderedza mikana yavo yekukunda kana kuwana zvigaro zvakawanda musarudzo.
Your browser doesn’t support HTML5
Nyaya Ina Godwin Mangudya