Imwe nhengo yedare reparamende inoti nyika iri kurasikirwa nemari yakawanda zvisina maturo zvichitevera kupihwa basa kuimwe kambani yechipiri muAmerica kuitira kuti igadziridze hukama hwehurumende yaVaEmmerson Mnangagwa nehurumende yaVaDonald Trump.
Nhengo yeparamende yeMDC, Amai Concelia Chinanzvavana, vaudza Studio 7 kuti zviri kuitwa nehurumende hazvibatsiri.
Amai Chinanzvavana vati Zimbabwe ikaremekedza bumbiro remitemo yenyika nekutevedzera mitemo yavo, zvinochenesa chimiro chenyika kunze pasina kushandisa mari yakawanda sezvairi kuita pakubhadhara makambani ekuAmerica, Avenue Strategies neBallard Partners, mari yakawanda.
Izvi zvatsigirwawo nemutungamiri weMDC, VaNelson Chamisa, avo vatiwo hurumende iri kupedza mari yenyika nezvinhu zvisina maturo. VaChamisa vatiwo mari iri kushandiswa kubhadhara makambani ekunze aya inofanirwa kugadzirisa mamwe matambudziko ari munyika muno.
Sachigaro wekomiti yeparamende yezvekudyidzana nedzimwe nyika, uye vari nhengo yeZanu PF, VaKindness Paradza, vaudza Studio7 kuti vanga vasingakwanisi kutaura nezvenyaya iyi.
Asiwo mumwe muongorori wezvematongerwo enyika, VaFarai Mabeza, vati zviri kuitwa neZimbabwe izvi hazvisi zvinhu zvinoshamisa sezvo dzimwe nyika dzichitora matanho aya mukutsvaka kuti dziwane kudyidzana kuri nani neAmerica.
Gurukota rezvekudyidzana nedzimwe nyika, VaSibusiso Moyo, ndivo vanonzi vakasaina muna Kubvumbi magwaro ekupa basa kukambani yeAvenue Strategies Global LLC kuti imiririre Zimbabwe muvaka hukama hwayo nehurumende yeAmerica kuti zvirango zvehupfumi zvakatemerwa nyika zvibviswe.
Izvi zviri mumagwaro mubazi rezvimutemo pasi pechikamu chinonyoreswa masangano ose anoshandira nyika dzekunze muAmerica, cheForeign Agents Registration Act.
Magwaro aya anoonekwa pachena kuburikidza nekuenda padandemutande reForeign Agents Registration Act.
Kambani yeAvenue Strategies ichange ichibhadharwa neZimbabwe mari inoita miriyoni yemadhora ekuAmerica izvo zviri kupa vamwe vagari kuti vanyunyute vachiti mari iyi ingadai yashandiswa kuzvipatara, kuwanisa varairidzi mari dzemihoro nezvimwewo zviri kunetsa munyika.
VaMoyo vakasainazve gore rino chibvumirano nekambani yeBallard Partners kuti imirire Zimbabwe mukugadzirisa hukama hwayo nehurumende yaVaTrump.
Makambani aya ane vakuru vakuru vakamboshanda sezvipangamazano zvaVaTrump munguva yavaitsvaga rutsigiro musarudzo yemutungamiri weAmerica.
Avenue Strategies yakavambwa neumwe wevaimbove chipangamazano chaVaTrump, Va Corey Lewandowski, avo vakazosiya kambani iyi muna 2017.
Ukuwo Ballard Partners ikambani yaive nevanhu vaishandawo sezvipangamazano zvaVaTrump muna 2016, apo vaitsvaga rutsigiro musarudzo yemutungamiri wenyika.
VaTrump vakakunda Amai Hilary Clinton musarudzo iyi.
Studio7 haina kukwanisa kunzwa kumutauriri wehurumende, VaNick Mangwana, padanho rakatorwa nehurumende.
Your browser doesn’t support HTML5
Nyaya Ina Rutendo Mawere