Zvinhu zvinonzi hazvisati zvanyatsonaka muzvipatara zvehurumende munyika izvo zviri kupa kuti vana chiremba vazhinji nevakoti vanenge vapedza kushandira hurumende kwenguva yavakanyorearana pasi, vaende kunotsvaga mafuro manyoro kunze kwenyika.
Vana chiremba vanoti vachiri kutambira mari iri pasi pemazana matatu emadhora pamwedzi zvekuti zvipatara zveHarare neParirenyatwa, zviri kunetsekana kuunza nyanzvi itsva nekuda kwekushaikwa kwemari.
Vana chiremba vava nguva vari pabasa, uye vaine hunyanzvi hwepamusoro, vari kutambira mari inosvika mazana matatu nemakumi mashanu emadhora pamwedzi. Ukuwo varwere vanonzi vari kuwanda zvakanyanya kuzvipatara zvikuru zvemunyika zvekuti vashandi vari kutadza kuvabatsira nemazvo.
Va Brighton Chizhande ndivo vaimbova mutungamiri weHospital Doctors Association. VaChizhande vanoti vakoti nemadhokotera mazhinji ari kushanda asi asingafari nemamiriro akaita zvhinu muzvipatara.
Kubva pakaumbwa hurumende yemubatanidzwa, veruzhinji vaitarisira kuti zvinhu zvichashanduka nekukurumidza. Asi nyanzvi munyaya dzehupfumi dzinoti pachatora nguva yakareba kuti zvinhu zvigadzikane.