Zvizvarwa zveZimbabwe pamwe nedzimwe nyika zviri muSouth Africa zvinonzi zvava kugara zvakabatira ura mumaoko zvichityira hupenyu hwazvo pachapera mitambo ye World Cup muSouth Africa.
Zvinonzi vanhu vemuSouth Africa vari kufamba mumatireni nemumakombi vachiudze vekunze vari munyika iyi kuti vachavarova panopera mitambo yenhabvu iyi. Zvinonzi zvinhu zvatotanga kuipa munzvimbo dzakaita se Yeoville, uko kuri kushungurudzwa vasiri zvizvarwa zvemu South Africa.
Hurumende yeSouth Africa inonzi yaronga komiti yemapazi ehurumende ichaongorora zviri kuitika, sezvo pave nemashoko ekuti pane munhu akapondwa mumhirizhonga yemarudzi muSouth Africa.
VaGabriel Shumba ndivo Executive Director veZimbabwe Exiles Forum. VaShumba vanoti ichokwadi kuti vasiri zvizvarwa zvemu South Africa vari kutyisidzirwa, uye hurumende iri kuferefeta nyaya iyi.