Mapato anopikisa eMDC ose aro maviri anoti nhengo dzawo mudare reparamende nhasi masikati dzichatsigira hurongwa hwekubvisa, VaRobert Mugabe, pachishandiswa paramende kana kuti Impeachment.
Bato reZanu PF raudza mukokeri waro muparamende, VaLovemore Matuke, kuti vaenderere mberi nehurongwa hwavo hwekuti VaMugabe vadzingwe zviri pamutemo kana kuti impeachment.
Mutevedzeri wenyori anoona nezvemutemo muPolitiburo yeZanu PF, VaPaul Mangwana, vati makomiti ebato iri mumatunhu ese munyika akaita misangano neChishanu akatora danho rekuita musangno weCentral Committee neSvondo apo bato iri rinotarisirwa kusarudza mutungamiri mutsva.
Vakarwa muhondo yerusununguko vari kuita musangano wekutenda zvakaitwa nemauto ayo akabvisa mutungamiri wenyika, VaRobert Mugabe, pamasimba ekutonga.
Vakarwa hondo yerusununguko pamwe neveruzhinji munyika varumbidza mukuru wemauto, General Constantine Chiwenga, segamba risina rusarura vachiti mushure mekubvuta simba kuna VaMugabe svondo rino vangadai vakazvigadza semutungamiri wenyika.........
Nyanzvi munyaya dzematongerwo enyika dzinoti mutungamiri wenyika, VaRobert Mugabe, semunhu mukuru, vangadai vakasiya basa kare uye dai hutongo hwavo hwaive hwakanaka, vangadai vasiri mumatambudziko avari pari zvino.
Mumiriri wemubatanidzwa wenyika dzekuEurope, VaPhillipe Van Damme, varamba kutaura zvakawanda pamusoro pezviri kuitika muZimbabwe vachiti vari kutaura nevakuru vavo kumuzinda weEU kuBrussels.
Mumwe murume wemuHarare, VaIgnatius Mhuriro, avo vakambobatwa batwa nemhirizhonga yezvematongerwo enyika, vakavamba sangano rinobatsira vanhu vanowirwa nedambudziko remhirizhonga nekurapwa pamwe nekuti vatange hupenyu hutsva vachiita mabasa akasiyana siyana.
Dare repamusoro rapa chizvarwa chekuAmerica Muzvare Martha O’Donovan, mukana wekubvisa mari yechibatiso inoita chiuru chemadhora kuitira kuti vatongwe vachibva kumba kwavo.
Mutungamiri wenyika, VaRobert Mugabe, vadzinga mumwe wevatevedzeri wavo, VaEmmesron Mnangagwa, basa vachiti maitiro avo ange asisaenderane nechinzvimbo chavo muhurumende.
Mabasa ehutano munyika anotarisirwa kuramba achidzikira gore rinouuya mushure mekunge bazi rezvemari razivisa kuti harina mari yakawanda yekupa bazi rezvehutano mubhajeti yegore rinouya.
